Ang Desisyon na Ihinto ang Pag-inom ng Alak

Ang Desisyon na Ihinto ang Pag-inom ng Alak

Ikaw lamang ang makakapagdesisyon na tumigil sa pag-inom ng alak. Maging ang iyong pamilya, mga malalapit na kaibigan, mga kamag-anak o mga kakilala ay walang magagawa kung ayaw mong itigil ang labis na pag-inom. Tanging ikaw lamang ang makagagawa ng pasya sapagkat ikaw ang may katawan. Ikaw ang hari ng iyong sarili. At ikaw ang higit na apektado sa lahat ng mga problemang dumating, dumarating at darating pa sa iyong buhay sanhi ng hindi mapigil na pag-inom ng mga nakalalasing na inumin. Hihintayin mo pa bang pulutin ka ng iyong pamilya sa hospital sanhi ng masasamang epekto ng alcohol sa kalusugan ng tao bago ka magdesisyong magpakatino? O umutang ng pampiyansa dahil sa pagkakakulong bunga ng mga gulong kinasangkutan mo bago ka magpasyang itigil ang ganitong bisyo? Kung hindi ngayon ang panahon, kailan pa?

Ang desisyon mo ay mahalaga.

Ang desisyon mo ngayon ang magiging basehan ng iyong pagbabagong buhay. Ito ang pundasyon na magdidikta kung ano mang pagbabago ang pwedeng maganap kapag napagpasyahan mong huminto na sa paglalasing. Sa pagdedesisyong ito nakasalalay ang kinabukasan mo at ang kinabukasan ng mga pangarap na dati mong pilit na inaabot bago ka nalulong sa alcohol. Hindi pa huli ang lahat at maaari mo pang maitawid ang iyong mga paa tungo sa tagumpay. Habang may buhay, may pag-asa. At ang pag-asang ito ang siyang gawin mong pantulak upang makapagdesisyon ka na. Ito ang gagawin mong sigla upang matiyak mo na ang paghinto ang siyang pinakamabuting desisyon sa iyong buhay.

Huwag nang magpatumpik-tumpik. Kapag inaakala mong dapat ka nang huminto, dapat ka nang huminto ngayon. Ngayon na. Hindi bukas, hindi sa makalawa, hindi sa isang buwan kundi ngayon. Huwag mo nang hintaying abutin ka ng baha bago ka lumikas. Huwag mo nang hintaying masira ang iyong buhay bago mo ayusin ito. Marami na ang napahamak dahil sa ganitong pananaw. Huwag kang gumaya sa ganitong prinsipyo ng buhay. Kapag naniwala kang may mga problemang kaakibat ang labis na paglalasing at may masasamang epekto ang alak, kailangan mo nang gawin ang iyong mga plano at ihinto ang anumang bisyong nakagawian. Maaaring mahuli ang lahat sa isang iglap lamang. At malalaman mong tama ang salawikain na “Nasa huli ang pagsisisi”.

Ang desisyon mo na ihinto na ang pag-inom ng alak ang unang hakbang sa pagbabago. Kapag nabuo na sa iyo ang desisyong ito at bukal sa loob mo ang kapasyahan, maaari nang gawin ang mga susunod na hakbang. At dito na magisimula ang malaking pagbabago hindi lamang sa iyong buhay kundi pati na rin sa buhay ng iyong pamilya. At magiging madali na sa iyo ang pagtupad at pag-abot sa mga pangarap na minsan mo nang pinilit na abutin.

Masama sa Kalusugan ang Alak

Payo sa Paghinto ng Pag-inom ng Alak

Masama sa kalusugan ang labis na pag-inom ng alak. Alam ng lahat ang masasamang epekto nito sa buhay ng isang tao at maging sa mga taong malalapit sa kanya. Maaari nitong sirain ng lubusan ang kanyang pagkatao, pamumuhay, relasyon at trabaho. Sa patuloy na pag-abuso ng isang tao sa alak at alcohol, unti-unti rin niyang sinisira ang kabuuan ng kanyang buhay.

Huwag maging bikitma ng alak.

Maging ang mga taong kaunti lamang kung uminom ay hindi rin ligtas sa ganitong kalagayan. Maaaring maging lulong dito ang isang tao kung patuloy pa rin siyang iinom ng alak.Dito kadalasang nagsisimula ang mga problemang kaakibat ng alcoholism. Sapagkat ang alak nga ay isang nakakaadik na substance at sa walang tigil na pagkonsumo nito, ang isang tao ay maaaring maging dependent dito. Darating ang oras na malalaman niya na hindi na pala siya maaaring mabuhay at kumilos na walang alak sa katawan.

Ang isa sa pinakamahirap na aspeto ng alcoholism ay ang katotohanang ito ay isang uri ng sakit. Marami sa mga Filipino ang hindi lubos na nakauunawa na ito’y nangangailangan ng karampatang medical attention upang gumaling. At ang masakit, lumalala ang kondisyon ng isang taon mayroon nito dahil sa pagtanggi, pag-iwas o hindi pag-amin na siya ay may problema. O dahil hindi niya alam na siya ay may ganito nang karamdaman. Ang alcoholism kasi ay isang mapagkunwaring sakit at ang isang taong mayroon nito ay maaaring lumala sa dahilang kulang siya sa kaalaman o hindi niya alam ang tungkol sa mga bagay na ito.

Ngayon na ang tamang panahon upang magsimulang ayusin ang iyong buhay. Ngayon na ang tamang oras upang tumigil sa pag-inom ng alak. Maaari kang kumunsulta sa isang mangggamot o isang grupo ng mga taong maaaring makatulong sa iyo. Maaari ka ring pumunta sa isang alcohol rehab center upang matingnan ang iyong kondisyon ay upang malaman kung ano ang maaaring gamot upang gumaling ka. May mga taong maaaring gamutin sa bahay ngunit maraming sitwasyon na kung saan ang gamutan ay dapat na maganap sa isang rehabilitation center na siyang may sapat at tugmang paraan at programa na makakatulong ng malaki sa paggamot sa alcoholism.

Kung nagdesisyon kang tumigil na sa pag-inom ng alak, kailangan mong malaman buhat sa isang doctor kung ikaw ay dapat na sumailalim sa gabay at pangangalagang medikal upang masiguro ang iyong kaligtasan. Laging tandaan na ang anumang addiction na naging bahagi na ng iyong buhay ay maaaring magdulot ng mga negatibong sintomas na maaaring makasama sa iyong kalusugan. Isa sa mga ito ay ang alcohol withdrawal symptoms na nagdudulot ng mga komplikasyon kung bigla ang paghinto sa pag-inom ng alak.

May mga gamot na maaaring makatulong upang mabawasan, kung hindi man maihinto ng lubusan ang mga sintomas na ito. Ngunit siguruhin lamang na may karampatang reseta na nanggaling sa isang propesyonal upang makatiyak na ang iniinom na gamot ay tugma sa iyong kondisyon. Maaaring labanan ang anumang addiction kung tama ang anumang gawain at plano. 

Maging mapanuri sa kondisyong ito. Dapat na pag-aralang mabuti ang mga gagawin kung binabalak na ihinto ang pag-inom. Magkaroon ng sapat na kaalaman at itigil ang pag-inom habang maaga upang hindi magsisi sa bandang huli ng iyong buhay.